ပြန်ကြားချက်-ဘင်္ဂလီများနှင့် မြန်မာ့လူ့အဖွဲ့အစည်း အပိုင်း (၉-ခ)

သမိုင်းကို လေ့လာရာမှာ ရာဇဝင်ကျမ်းတွေ၊ နောက်ပိုင်း သမိုင်းပညာရှင်တွေ ပြုစုတဲ့ သမိုင်း

ကျမ်းတွေ လောက်ကိုပဲ ကိုးကားလို့မရပါဘူး။ အမိန့်တော်ပြန်တမ်းတွေ၊ စစ်တမ်းတွေ၊

ကျောက်စာတွေ၊ အဆောက်အအုံလက်ရာတွေ၊ သက်ရှိလူတွေ အားလုံးကို လေ့လာပြီး မှ

တစ်စုံတစ်ရာ ကောက်ချက်ကို ချရပါတယ်။ ဗိုလ်မှူး ဘရှင် ရဲ့ မြန်မာနိုင်ငံတော် သမိုင်း စာအုပ်

ဟာ အခြေခံအဆင့်ကျောင်းသားတွေ အတွက်ဘဲ ရည်ရွယ်ကြောင်း၊ အဲဒီစာအုပ်လေး တစ်

အုပ် က မြန်မာ့သမိုင်းအကျဉ်းမျှသာ ဖော်ပြတဲ့ စာအုပ်ဖြစ်ကြောင်း စာအုပ်ပြုစုသူ ဗိုလ်မှူး

ဘရှင် ကိုယ်တိုင် က စာမျက်နှာ (၃) နဲ့ (၄) မှာရေးသားထားပါတယ်။ ဆရာကြီး ဦးဘသန်း

ရဲ့ကျောင်းသုံးမြန်မာရာဇဝင် စာအုပ်ဟာလည်း အထက်တန်းအဆင့်ကျောင်းသားတွေ အတွက်

ရည်ရွယ်ပြုစုထားတာ ဖြစ်ကြောင်း ဆရာကြီးကိုယ်တိုင် က စာအုပ် နိဒါန်း စာမျက်နှာ (၂) မှာ

ရေးသားထားပါတယ်။ ဆရာကြီးဒေါက်တာထင်အောင် ရဲ့ A History of Burma စာအုပ်မှာတော့

စနေမင်း အကြောင်းက တစ်ကြောင်းဘဲပါပါတယ်။ အဲဒါကြောင့် စနေမင်းလက်ထက်သမိုင်း

အကြောင်းအရာတွေ နဲ့ပတ်သက်ပြီးအဲဒီ စာအုပ်ကို ကိုးကားဆွေးနွေးလို့မရပါ။

 အထက်ပါ ရာဇဝင်ကျမ်း သုံးကျမ်း လောက်ကို ကိုးကားပြီး မြန်မာ့သမိုင်း ရဲ့ ရောင်တော်ပြန်
ကို ထင်ဟပ်ပြလို့မရပါ။ အထက်ပါ ကျမ်း သုံးကျမ်း မှာ မပါရှိတိုင်း "သမိုင်းမရှိ" လို့ သုံးသပ်
မရသလို၊ မှန်နန်းရာဇဝင်အစရှိတဲ့ မြန်မာရာဇဝင် တွေမှာပါတိုင်းလည်း ဇွတ်မျက်စိမှိတ်
ယုံကြည်လိုက်လို့ မရကြောင်း လေးစားစွာ အကြံပေးလိုပါတယ်။

ကိုမြတ်သိန်းထွန်း က နိုင်ငံ့ဂုဏ်ဆောင် သမိုင်းပညာရှင်ကြီး ဇေယျကျော်ထင်ဗိုလ်မှူးဘရှင်
နဲ့ ပတ်သက်ပြီး အလွန်ကို ပွင့်လင်းစွာ ဝေဖန်သုံးသပ်ထားတာတွေ မြင်ရပါတယ်။ ပွင့်ပွင့်
လင်းလင်း ပြောရရင်၊ မိမိ ထက် အလွန်တရာမှ သက်ကြီး၊ ဝါကြီး၊ ပညာကြီး၊ သဘာကြီး
လှတဲ့ ပညာရှင်ကြီးတွေ ကို မိမိမှန်တယ်ထင်ရင် ပြတ်သားစွာ ဝေဖန်ဝံ့ တဲ့ သတ္တိ ကို
ကျွန်တော် အသိအမှတ်ပြုပါတယ်။ ဒါပေမဲ့ ဒီလို ကြီးကျယ်လှတဲ့ ပညာရှင်ကြီးမျိုးကို
ထောက်ပြဝေဖန်ဖို့ရာ ကိုယ်ကလည်းဘဲ သက်ဆိုင်ရာ ဘာသာရပ်မှာ အလွန်တရာမှ ကျွမ်း
ကျင်နှံ့စပ်နေရပါတယ်။ တကယ်လို့ ကိုယ်ဝေဖန်လိုက်တဲ့ အချက် ဟာ အလွဲကြီးဖြစ်နေရင်
ငွေတစ်မတ်နဲ့ငါးကြင်းခေါင်းတက်ကိုင်တဲ့ အဖြစ်မျိုး ၊ ချည်ပြာထမီနဲ့တာဝတိံသာ လှမ်း
တဲ့ အဖြစ်မျိုး  ကို ရောက်သွားတတ်ကြောင်း စေတနာစကားလေး လက်ဆောင်ပါးပါရစေ။

ဗိုလ်မှူးဘရှင် ဟာ အမိ မြန်မာပြည် က မွေးဖွားသန့်စင်ပေးခဲ့တဲ့ ပြည့်ဂုဏ်ဆောင်သားကောင်း
ရတနာ တစ်ဦးတင်မက မြန်မာနိုင်ငံသားမွတ်စ်လင်မ် (မြန်မာမွတ်စ်လင်မ်) တို့ရဲ့ ဦးစီး ဦးဆောင်
နာယကကြီးတစ်ပါးလည်း ဖြစ်ကြောင်းကျွန်တော် ခံယူထားပါတယ်။ သို့ပေမဲ့လည်း၊ ဗိုလ်မှူးဘရှင်
မှားရင်လည်း မှားတဲ့အကြောင်း အသိအမှတ်ပြု ခံယူတတ်ရမှာဖြစ်ကြောင်း မြန်မာမွတ်စ်လင်မ်
တစ်မျိုးသားလုံးကို လေးစားစွာပန်ကြားအပ်ပါတယ်။ မမှားသောရှေ့နေ၊ မသေသော ဆေးသမား
ရှိရိုးထုံးစံ မရှိမဟုတ်ပါလားခင်ဗျား။

ဆရာကြီး ဗိုလ်မှူးဘရှင် နဲ့ ပတ်သက်ပြီး ကိုမြတ်သိန်းထွန်း ဝေဖန်သုံးသပ်ထားတာလေးတွေ
မှန်မမှန် ဟုတ်မဟုတ် လေ့လာကြည့်ကြပါစို့လားခင်ဗျာ။


ဝေဖန်ချက် (၁)

ဗိုလ်မှူးဘရှင်ရေးသားတဲ့ မြန်မာနိုင်ငံတော် သမိုင်းမှာ အိန္ဒိယကစစ်ရှုံးပြီး တပ်ပျက်လာတဲ့
စစ်သားတွေဟာ အင်းဝကိုလာရောက်ခိုလှုံတယ်လို့ ဖော်ပြထားပါတယ်။ ဒီတင်ပြမှုဟာ
ဗိုလ်မှူးဘရှင်ရဲ့မြန်မာ့သမိုင်းကလွဲလို့ တခြား ဦးဘသန်းနဲ့ဒေါက်တာထင်အောင် တို့ရဲ့
သမိုင်းစာအုပ်တွေမှာ မပါရှိပါဘူး။ အိန္ဒိယကတပ်ပျက်စစ်သားတွေ အင်းဝကိုခိုလှုံတဲ့
အကြောင်းနဲ့ပတ်သက်ပြီး ဗိုလ်မှူးဘရှင်က သူ့ရဲ့သမိုင်းစာအုပ်မှာ အကိုးအကားဖော်ပြ 
ထားတာ လုံးဝမရှိပါဘူး။

လေ့လာဆန်းစစ်ချက်

ဗိုလ်မှူးဘရှင်ရေးတဲ့ အိန္ဒိယစစ်တပ် ရဲ့ တပ် တစ်တပ် ဟာ မြန်မာနိုင်ငံ ထဲ လာရောက်
ခိုလှုံခဲ့တဲ့ သမိုင်းကြောင်း က ဆရာကြီး  D.G.E Hall ရဲ့ Early English Intercourse
with Burma စာမျက်နှာ (၁၄၄) မှာ ပါရှိပါတယ်။ အင်္ဂလိပ်ပိုင် အရှေ့အိန္ဒိယ ကုမ္ပဏီ
နဲ့ မဂိုမင်း ဩရန်ဇစ် တို့ဟာ 1689 ခုနှစ်မှာ တိုက်ပွဲဖြစ်ပွါးခဲ့ပါတယ်။ အရှေ့အိန္ဒိယ
ကုမ္ပဏီ စစ်ရှုံးပါတယ်။ အဲဒီ ခုနှစ်မှာဘဲ အိန္ဒိယ မဒရပ် မှာ ဘေးဒုက္ခဆိုက်ရောက်ပါ
သေးတယ်။ ကုမ္ပဏီဝန်ထမ်းတွေ နဲ့ အင်္ဂလိပ်လူမျိုး အရာရှိမိသားစုတွေ ဟာ မြန်မာ
နိုင်ငံ ကို ပြောင်းရွှေ့ အခြေချ နေထိုင်ခဲ့ကြပါတယ်။ သို့သော် ဗိုလ်မှူးဘရှင် က စနေမင်း
လက်ထက်လို့ဆိုထားပေမဲ့၊ D.G.E Hall ရဲ့ အထက်ပါ ဖော်ပြချက် ခုနှစ် အရ၊ ၁၆၈၈-၈၉
ဟာ စနေမင်းရဲ့ ခမည်းတော် မင်းရဲကျော်ထင် က ထီးနန်းကိုစိုးစံနေချိန်ဖြစ်နေပါတယ်။
ဗိုလ်မှူး ဘရှင်ရဲ့ ဖော်ပြချက် မှာ "စနေမင်း" လို့ ပါရှိတဲ့ အတွက်၊ မင်းအမည်လွဲမှား
နေတယ်လို့ ကျွန်တော်လောလောဆယ်ယူဆပါတယ်။ သို့သော် ဒီအချက်အလက်နဲ့
ပတ်သက်ပြီးကျွန်တော် ထပ်မံ လေ့လာပါဦးမယ်။ "မြန်မာနိုင်ငံတော်သမိုင်း" စာအုပ်
ဟာ အခြေခံအဆင့်အတွက်ရည်ရွယ်ပြီး ထုတ်ဝေထားတဲ့ အတွက် စာအုပ်ဖြစ်တဲ့
အတွက် အကိုးအကားတွေကို မဖော်ပြထားကြောင်း တက္ကသိုလ်ဝင် နိုင်ငံသမိုင်း
ကျမ်းရေးသားရင်တော့အကိုးအကားအပြည့်အစုံ ဖော်ပြမှာဖြစ်ကြောင်း ဗိုလ်မှူးဘရှင်
ကိုယ်တိုင် က "မြန်မာနိုင်ငံတော်သမိုင်း" စာမျက်နှာ (၄) မှာ ရေးသားထားပါတယ်။




ဝေဖန်ချက် (၂)  

နောက်ပိုင်းမှာ ရွှေဘို၊ မြေတူးစတဲ့နယ်တွေကို မဏိပူရက ကသည်းတွေ ဝင်ရောက်
တိုက်ခိုက်ဖျက်ဆီးကြောင်း ဦးဘသန်းနဲ့ဒေါက်တာထင်အောင်ကရော ဗိုလ်မှူးဘရှင်က
ပါရေးပါတယ်။ ဓာတ်ပုံအထောက်အထားတွေ အပေါ်မှာဖော်ပြထားပါတယ်။
အဲဒီတိုက်ပွဲမှာ ဗိုလ်မှူးဘရှင်ရေးခဲ့တဲ့ မူဆလင်စစ်သားတွေ ခုခံကာကွယ်ကြကြောင်းတော့
မပါဘူးခင်ဗျ။ အဲဒီအချိန်က ဗမာဘုရင့်သစ္စာခံစစ်သား မူဆလင်များမခုခံဘဲ ဘယ်
များရောက်နေကြပါလိမ့်။ ဧရာဝတီမြစ်ထဲ ရေဆင်းချိုးပြီး ခေါင်းဆေးမင်္ဂလာလုပ်ပြကြလို့
ရုပ်ချင်းကခပ်ဆင်ဆင်မို့ ကသည်းတွေကမသတ်ဘဲ ထားခဲ့လေသလား။ မြန်မာနိုင်ငံ
သမိုင်းကော်မရှင် ဥက္ကဌတစ်ဦးရဲ့ အထောက်အထားမဲ့ စိတ်ထင်ရာ လျှောက်ရေးတဲ့
သမိုင်းကို ကျောင်းသုံးစာအုပ်အဖြစ် အဲခေတ်ကကျောင်းသားတွေ သင်ကြားခဲ့ရပါတယ်။


လေ့လာဆန်းစစ်ချက်

ကသည်းတွေ ဟာ စနေမင်း ရဲ့ ခမည်းတော် မင်းရဲကျော်ထင် လက်ထက်ကတည်း က
မြန်မာ့ပိုင်နက် ကို သွေးတိုးစမ်းလာခဲ့တာဖြစ်ပါတယ်။ တနင်္ဂနွေမင်း လက်ထက် မှာလည်း
ကသည်းတွေနဲ့ တိုက်ပွဲတွေဖြစ်ပွါးခဲ့ပါတယ်။ မဟာဓမ္မရာဇာဓိပတိ မင်းလက်ထက်မှာ
ကသည်းတွေ ဟာ မြေတူး ၊ ရွှေဘို စတဲ့ နယ်တွေ ကို မကြာခဏ လာရောက်တိုက်ခိုက်
လေ့ ရှိပါတယ်။ အေဒီ ၁၇၃၅ ခန့်မှာ ကသည်းတွေ ဟာ မြေတူးမြို့ကိုတိုက်ခိုက်ပြီး
ကုလား ဗမာ လူတစ်ထောင်ကျော်ခန့်ကို ဖမ်းယူသွားခဲ့ကြောင်း တွင်းသင်း တတိယတွဲ
စာမျက်နှာ (၁၄၇) မှာ ပါရှိပါတယ်။ စနေမင်းလက်ထက်ကတည်း က ကုလားဝန် ရှိပြီး
ဖြစ်ကြောင်း ကျွန်တော် အပေါ်မှာ တင်ပြခဲ့ပါတယ်။ ကသည်းတွေ မြေတူးကို ဝင်ရောက်
တိုက်ခိုက်တုန်း ကာလ က ကုလားဝန် ဟာ နန္ဒကျော်ထင် ဖြစ်ကြောင်း ဒေါက်တာ ရီရီ
ရေးသားပြီး နိုင်ငံသမိုင်း ဦးစီးဌာန က ၁၉၇၃ မှာ ထုတ်ဝေတဲ့ "မြန်မာနိုင်ငံ အခြေအနေ
(၁၇၁၄-၅၂) စာမျက်နှာ (၄၀) မှာဖော်ပြထားပါတယ်။ ကုလားပျိုပသီတပ် ဟာ ကုလားဝန်
နန္ဒကျော်ထင်ရဲ့ ကွပ်ကဲမှု အောက်မှာ တောက်လျှောက်ရှိနေပြီး ကသည်းတွေ ကို ခုခံတွန်း
လှန်နေခဲ့ တာပါ။ ကုလားဝန် နန္ဒကျော်ထင် အားဖြည့်ထားတဲ့ ကောင်းမှုတော်တပ်ကို
ကသည်းတွေ က အပြင်းအထန်တိုက်ခိုက်တဲ့ အချိန် မှာ သင်္ဘောသား ကုလား တွေ က
ကသည်းတွေ ကို ဝင်တိုက်တဲ့အတွက် ကသည်းတွေ ဟာ အသေအပျောက်များပြီးဆုတ်ခွါ
သွားခဲ့ရကြောင်း ရေးထားတာလေး သေချာဖတ်ကြည့်စေချင်ပါတယ်။ တိုင်းပြည် အရေး
ကိစ္စ အလွန်ကြီးမားနေတဲ့ အချိန် မှာ သေဘေးကို ကြောက်ပြီး အယောင်ဆောင် ရှောင်ဖယ်
နေတတ်တဲ့ သမိုင်း မြန်မာမွတ်စ်လင်မ်တွေမှာ မရှိဖူးပါ ကိုမြတ်သိန်းထွန်း ခင်ဗျား။
မြေဒူး မြန်မာမွတ်စ်လင်မ် သမိုင်း ဟာ မှန်နန်း၊ တွင်းသင်း၊ ဦးကုလား စတဲ့ မြန်မာရာဇဝင်
တွေ မှာအတိအလင်းကို ပါနေရဲ့သားနဲ့ " မြန်မာနိုင်ငံသမိုင်းကော်မရှင် ဥက္ကဌတစ်ဦးရဲ့
အထောက်အထားမဲ့ စိတ်ထင်ရာ လျှောက်ရေးတဲ့သမိုင်း" လို့ မဆင်မခြင်သုံးနှုန်းလိုက်ခြင်း
ဟာ ဘယ်လို မှ ယဉ်ကျေးတဲ့ အမှု မဟုတ်ပါ။ လေးစားရတဲ့ ကိုမြတ်သိန်းထွန်း တစ်ယောက်
နောက်နောင် ဒီလို ကိုယ့်ဂုဏ်သိက္ခာ ကိုယ်ပြန်ထိပါးစေတတ်တဲ့ အသုံးအနှုန်းတွေ မသုံးမိ
စေဖို့ ရာ ကျွန်တော် ဆန္ဒပြုမိပါတယ်။




ဝေဖန်ချက် (၃)

ဗိုလ်မှူးဘရှင်ရေးခဲ့တဲ့ သမိုင်းအလွဲတစ်ခုကို ထောက်ပြရမယ်ဆိုရင် အင်္ဂလိပ် - မြန်မာ စစ်ပွဲ
သုံးပွဲစလုံးကို အင်္ဂလိပ်တွေက စစ်ကြေညာပြီးတိုက်တယ်လို့ တင်ပြခဲ့တာပါ။ မျှတတဲ့ အင်္ဂလိပ်
သမိုင်းပညာရှင်တွေ၊ မြန်မာသမိုင်းပညာရှင်တွေကတော့ ပထမစစ်ပွဲမှာသာ စစ်ကြေညာခဲ့ပြီး
ကျန်စစ်ပွဲနှစ်ပွဲကတော့ မကြေညာသော စစ်ပွဲများသာဖြစ်ကြောင်း ရေးသားခဲ့ပါတယ်။ ဗိုလ်မှူး
ဘရှင်ဟာ မြန်မာသမိုင်းပညာရှင်တွေကို အတိအလင်းဆန့်ကျင်ပြီး အလွန်ရဲတင်းစွာရေးသား
ထားတာဖြစ်ပါတယ်။


လေ့လာဆန်းစစ်ချက်

အင်္ဂလိပ်မြန်မာ စစ်ပွဲ သုံးပွဲစလုံး ဟာ စစ်ကြေညာပြီး တိုက်ခိုက်ခဲ့တဲ့ စစ်ပွဲတွေပါ။ ၁၈၂၄ ခုနှစ်၊
မတ်လ (၅) ရက်နေ့ မှာ အိန္ဒိယဘုရင်ခံချုပ် Lord Amherst   က  အင်္ဂလိပ်မြန်မာစစ် (ပထမ)
ဖြစ်ကြောင်း ကြေညာခဲ့ပါတယ်။ ပထမ အင်္ဂလိပ်မြန်မာစစ် ဟာ ရန္တပိုစာချုပ်နဲ့ ငြိမ်းအေးခဲ့ရပါတယ်။
ဒါပေမဲ့ ၁၈၃၇ ခုနှစ် မှာ နန်းတက်ခဲ့တဲ့ သာယာဝတီမင်း ဟာ ရန္တပိုစာချုပ် ကို အသိအမှတ်မပြုတဲ့
အတွက် ရန္တပိုစာချုပ် အရ ခန့်အပ်ထားရှိခဲ့တဲ့ အင်္ဂလိပ်ကိုယ်စားလှယ်တွေ ဟာ ၁၈၄၀ ခုနှစ်မှာ
ပြန်ခဲ့ကြ ရပါတယ်။ ဒါ့အပြင် မြန်မာတွေဟာ ရန္တပိုစာချုပ်ပါ အချက်တွေ ကို မလိုက်နာဘဲ ပျက်
ကွက်ခဲ့ကြောင်း အင်္ဂလိပ်တို့ က အကြောင်းပြပြီး အင်္ဂလိပ်ရေကြောင်းဗိုလ်မှူးချုပ် G.R Lambert
ကို ၁၈၅၂ ခုနှစ် မှာ သင်္ဘော (၆) စင်းနဲ့ စေလွှတ်ပြီး ဘုရင်ခံချုပ် Lord Dalhousie (လော့ဒလ်
ဟိုဇီ) အမိန့်နဲ့ Ultimatum (အန္တိမ ရာဇသံ) ပေးခဲ့ပါတယ်။ ရာဇသံ ကို မလိုက်နာတဲ့ အတွက်
၁၈၅၂ ဧပြီလ မှာ အင်္ဂလိပ်မြန်မာ (ဒုတိယ) စစ်ဖြစ်ပွါးကြောင်း ဆရာကြီး ဦးဘသန်း ရဲ့ ရာဇဝင်
စာအုပ်စာမျက်နှာ (၁၅၉) မှာ ရေးသားထားပါတယ်။





၁၈၈၅ မှာ ဖြစ်ပွါးခဲ့တဲ့ အင်္ဂလိပ်မြန်မာ (တတိယ) စစ်မှာလည်းဘုံဘေဘားမား ကုမ္ပဏီ သစ်ခိုး
မှု ကို မြန်မာတို့က ဒဏ်ငွေရိုက်တဲ့ အကြောင်းပြချက် နဲ့ ဘုရင်ခံချုပ် Lord Dufferin က
Ultimatum ပေးပို့ခဲ့ပြီး၊ မြန်မာတို့က Ultimatum အတိုင်း အတိအကျ မလိုက်နာတဲ့ အတွက်
စစ်ပြုခဲ့ရကြောင်း အင်္ဂလိပ် တို့ က ဆိုပါတယ်။ ဒီ တော့ စစ်ပွဲ (၃) ခုစလုံး ကို လေ့လာကြည့်ရင်
အင်္ဂလိပ်ဘက် က စစ်မကြေညာဘဲ တိုက်ခိုက်ခဲ့ကြောင်း ဘယ်လိုမှ သတ်မှတ်လို့မရပါ။
Ultimatum (အန္တိမ ရာဇသံ) ဆိုတာ စစ်ကြေညာခြင်း တစ်မျိုးပါဘဲ။ Ultimatum ပါ အချက်
တွေ ကို လိုက်နာရင် စစ်မတိုက်၊ မလိုက်နာရင် စစ်တိုက်မယ် ဆိုတဲ့ သဘောကို နားလည်မယ်
ထင်ပါတယ်။ အင်္ဂလိပ်-မြန်မာ စစ်ပွဲ နှစ်ခု (ဒုတိယ နဲ့ တတိယ) တွေ မှာ အင်္ဂလိပ် က စစ်
မကြေညာဘဲ တိုက်ခိုက်ခဲ့ကြောင်း ဦးဘသန်း ရဲ့ ရာဇဝင်ကျမ်းတွေမှာလည်း မရေးထားပါ။
Ultimatum ရဲ့ သဘောတရား ကို ကောင်းကောင်းနားလည်တဲ့ ဗိုလ်မှူးဘရှင် က စစ်ပွဲ (၃)
ခုစလုံးကို စစ်ကြေညာတိုက်ခိုက်ခဲ့တယ်လို့ ရေးသားထားခြင်း မှာ မည်သည့် အမှားအယွင်း
မှ မရှိပါခင်ဗျား။ အင်္ဂလိပ်မြန်မာစစ်ပွဲ တွေ နဲ့ ပတ်သက်ပြီး အင်္ဂလိပ်တွေ ရဲ့ တင်ပြချက် ကို
သိချင်ရင် Colonel W.F.B Laurie ရဲ့ "Our Burmese Wars and Relations with Burma"
စာအုပ် ၊ John Nisbet ရဲ့ "Burma under British Rule and Before" စာအုပ်တို့ ကို လေ့လာပါ။


ဦးဘသန်း ရဲ့ "ကျောင်းသုံးမြန်မာရာဇဝင်" နဲ့ ဗိုလ်မှူး ဘရှင် ရဲ့ " မြန်မာနိုင်ငံတော် သမိုင်း"
စာအုပ်တို့ကို တစ်ချိန်တည်း မှာ ကျောင်းသုံးစာအုပ် အဖြစ်ပြဌာန်းခဲ့တာ မဖြစ်နိုင်ပါ။
ဘာကြောင့်လဲဆို၊ ဦးဘသန်း စာအုပ်ဟာ (၁၉၃၀) ခုနှစ် မှာ ရိုက်နှိပ်ခဲ့ပြီး၊ ကိုလိုနီခေတ်
ကျောင်းတွေမှာ ပြဋ္ဌာန်းခဲ့တာဖြစ်ပြီး၊ ဗိုလ်မှူးဘရှင် စာအုပ် ဟာ (၁၉၄၈) ခုနှစ် မှာ ထုတ်ဝေ
ခဲ့ပြီး၊ လွတ်လပ်ရေးရပြီး ခေတ်မှာ မှ ကျောင်းသုံးစာအုပ် အဖြစ် စတင်ပြဋ္ဌာန်းခဲ့တာပါ။
ကိုမြတ်သိန်းထွန်းမေးမြန်းခဲ့တဲ့ လူကြီးသူမ တွေ ဟာ မှတ်ဥာဏ် ချို့ယွင်းနေလို့ အမှား
စကားတွေ ပြောမိတာဖြစ်ပါလိမ့်မယ်။

ဗိုလ်မှူးဘရှင်တို့ ခေတ်က အရင်းအမြစ် (resource) တွေဟာ အလွန်အင်မတန်ကန့်သတ်
ချက် (Very much limited) ရှိပါတယ်။ ဗိုလ်မှူး ဘရှင် ရဲ့ အရေးအသား ဟာ အနည်းငယ်
လွဲမှားနေတယ်ဆိုရင်တောင် လက်ခံဖွယ်ရာပါ။ လူသားတိုင်း ဟာ အမှားအယွင်း မကင်းပါ။
အရာရာ အလွယ်တကူ ရယူ လေ့လာနိုင်တဲ့ (easily accessible) ဒီလိုခေတ်မှာ တောင်
ဂျီဩမေတြီ သဘောတရား ကို အလွဲအမှား ဖော်ပြတဲ့ ဆရာကြီးဒေါက်တာ အေးချမ်း လို
သမိုင်းပညာရှင်ကြီး တောင်ရှိသေးတာဘဲ ခင်ဗျား။ ဆရာကြီးဒေါက်တာထင်အောင်၊ ဆရာကြီး
ဦးဘသန်း တို့ ရဲ့ စာအုပ်တွေမှာလည်း အမှားအယွင်းတွေပါရှိတာပါဘဲ။ ကြီးကျယ်တဲ့ ပညာ
ရှင်ကြီးတွေရဲ့  အသေးအဖွဲအမှားတွေ ကို က ကျွန်တော်တို့ အတွက် အတုယူစရာ သင်ခန်း
စာပါ။ သူတို့ ဒီလို မှားလို့သာ ကျွန်တော် တို့ သင်ခန်းစာ ရယူနိုင်တဲ့ အတွက် ကျွန်တော်
က တော့ ဗိုလ်မှူးဘရှင်၊ ဆရာကြီး ဦးဘသန်း တို့ အပါအဝင် ရိုးသားတဲ့ ပညာရှင်ကြီးတွေ
ကို ကျွန်တော့်ရဲ့ "ဆရာတွေ" အဖြစ် သတ်မှတ်လေးစားလျှက်ပါ။

ကိုမြတ်သိန်းထွန်း ရဲ့ အောက်ပါ အကြံပေးချက် ကို တော့ ကျွန်တော် အလွန်သဘော
ကျကြောင်းဝန်ခံလိုပါတယ်။

"သမိုင်းကိုလေ့လာတဲ့နေရာမှာ ဘယ်လောက်ပဲနာမည်ကျော်ကြားတဲ့ ပညာရှင်ဖြစ်နေပါစေ
တခါတရံမှာ စိတ်ထင်ရာလျှောက်ကွန့်ရေးတာမျိုးရှိတတ်တဲ့အတွက် ပုဂ္ဂိုလ်စွဲယုံကြည်မှုနဲ့
အဲဒီပညာရှင်ရေးထားသမျှ ရာနှုန်းပြည့်မှန်ကန်တယ်လို့ တထစ်ချသုံးသပ်လို့မရဘူးဆိုတာကို
 ပြောပြချင်တာဖြစ်ပါတယ်။ သမိုင်းပညာရပ်ကို လေ့လာမယ်ဆိုရင် ယုတ္တိကျကျ ဆင်ခြင်သုံး
သပ်မှုမပါပဲ ဘယ်နှစ်ခုနှစ်မှာ ဘယ်ပညာရှင်က ဘယ်ကျမ်းမှာ ဘယ်လိုရေးခဲ့လို့ဆိုတာမျိုး
အသေစွဲကိုင် ယုံကြည်မထားသင့်ဘူးဆိုတာကို လေးစားစွာ အကြံပြုပါရစေ။"

ကျွန်တော် ဆွေးနွေးလာတဲ့ တောက်လျှောက်မှာ ဗိုလ်မှူးဘရှင် ကို Quote လုပ်ပြီးဆွေးနွေး
ခဲ့တာ မရှိပါ။ ဗိုလ်မှူး ဘရှင် နဲ့ ပတ်သက်ပြီး စရေးခဲ့တာ ကိုမြတ်သိန်းထွန်းပါ။ ဆရာ
မောင်ကျော်ရှင်း စာအုပ် ကို ကိုးကားပြခဲ့တယ် ဆိုတာ က စာပေဗိမာန်စာမူဆုရ စာအုပ်
ပါတင်ပြချက်ကို ကိုမြတ်သိန်းထွန်း လက်ခံလောက်မယ်ထင်လို့ပါ။ ကိုမြတ်သိန်းထွန်း က
ရခိုင်ရာဇဝင်တွေကိုလည်း လက်မခံ၊ မြန်မာ့စွယ်စုံကျမ်းကိုလည်း လက်မခံ၊ G.E Harvey
တို့လို မျက်နှာဖြူ ပညာရှင်တွေ ကိုလည်းလက်မခံတဲ့နောက်တော့ ဆရာမောင်ကျော်ရှင်း
စာအုပ်ကို လက်မခံတာလည်း ကျွန်တော် မအံ့ဩမိပါ။ ဆရာမောင်ကျော်ရှင်းစာအုပ်ပါ
 ဖော်ပြချက် ကို ကျွန်တော် က မြန်မာ့ရာဇဝင်ကျမ်းတွေ၊ မျက်နှာဖြူတွေ ရဲ့ ကျမ်းတွေ၊
 မြန်မာမင်း ရဲ့ စစ်တမ်းတွေ၊ မြန်မာပညာရှင်တွေ ရဲ့ ဖော်ပြချက်တွေ နဲ့သက်သေထူခဲ့ပြီး
ပါပြီ။ဆရာကြီးဒေါက်တာအေးချမ်းရဲ့ တင်ပြချက်တွေကို ဘဲ ဘုရားဟောပမာ လက်ခံနေ
တဲ့ ကိုမြတ်သိန်းထွန်း တစ်ယောက်အပြောနဲ့ အလုပ်ညီပါစေလို့ ဆန္ဒဖြစ်မိပါတယ်။

ဆရာကြီး G.H Luce နဲ့ပတ်သက်ပြီး ကိုမြတ်သိန်းထွန်းရေးတာတွေ ကို ကျွန်တော်
စိတ်မဝင်စားကြောင်း ပြောကြားလိုပါတယ်။ ဆရာကြီး G.H Luce ဟာ သမိုင်းပညာ
မှာ ဒေါက်တာအေးချမ်းအပါအဝင် ယနေ့မြန်မာ့သမိုင်းပညာရှင်အားလုံးရဲ့ အဘိုးဆရာ
ဖြစ်ပါတယ်။ ဗိုလ်မှူးဘရှင်သာ ကိုမြတ်သိန်းထွန်း ပြောသလို စိတ်ထင်ရာလျှောက်ရေး
တဲ့ လူဖြစ်ခဲ့မယ် ဆိုရင် မြန်မာ့သမိုင်းကော်မရှင် က ဘာကြောင့်များ ဗိုလ်မှူး ဘရှင်ကို
ကျမ်းပြုအရာရှိ  အဖြစ် ခန့်အပ်တာဝန်ပေးခဲ့တာပါလဲ စဉ်းစားသင့်ပါတယ်။ ဗိုလ်မှူး
ဘရှင် ရဲ့ ပညာရှင်မဆန်တဲ့ အရေးအသားတွေ ရှိသေးကြောင်း ကိုမြတ်သိန်းထွန်းဆို
ထားပါတယ်။ ရှိသေးရင် ပြလှဲ့ပါ၊ ကျွန်တော်အလွန်စိတ်ဝင်စားပါတယ်။







ဗိုလ်မှူး ဘရှင်ဟာ မြန်မာ့စွယ်စုံကျမ်းမှာ ပါဝင်ရေးသားခဲ့ပေမဲ့၊ "ပုသိမ်" entry ကို ဗိုလ်မှူး
ဘရှင်ရေးခဲ့တာ ဟုတ်မဟုတ် ကိုမြတ်သိန်းထွန်းလည်း သေသေချာချာမသိပါ။ ဆရာမာဃ
ဆိုတာ ဗိုလ်မှူးဘရှင် မဟုတ်ပါ။ ဆရာမာဃ ဟာ ၁၉၁၄ မှာ မွေးဖွားခဲ့တဲ့ ပုသိမ်သား ဗုဒ္ဓ
ဘာသာဝင်ပါ။ အမည်ရင်း က ဦးသာတင်ဖြစ်ပါတယ်။ ဝဏ္ဏကျော်ထင်ဦးသာတင် လို့
လည်းခေါ်ပါတယ်။ "ပုသိမ်" ဆိုတဲ့ အမည်ဖြစ်ပေါ်လာပုံနဲ့ ပတ်သက်ပြီး အမျိုးမျိုးဖွင့်ဆို
ထားကြောင်းလေ့လာမိပါတယ်။"ကော့ပါဇိန်" က နေဆင်းသက် လာကြောင်းမလေ့လာမိပါ။
ဘယ်ကျမ်းစာအုပ်မှာ ရေးသားထားလဲ ဆိုတာ ပြောပြနိုင်မလားခင်ဗျာ။ ပုသိမ် ဆိုတဲ့အမည်
ဟာ မွန်ဘာသာကနေဆင်းသက်လာကြောင်း Hobson-Jobson မှာ ရေးသားထားခြင်းမရှိပါ။
ကိုမြတ်သိန်းထွန်း ကို တစ်ယောက်ယောက် က နောက်ကွယ်ကနေ ချောက်တွန်းနေတယ်
ထင်ပါတယ်။ Hobson-Jobson မှာ ပုသိမ် နဲ့ ပတ်သက်ပြီး ဘာရေးထားလဲ သိရအောင်
စာမျက်နှာ scan ပါတင်ပေးလိုက်ပါတယ်။





ပုသိမ် ရဲ့ တလိုင်း အသံထွက် က Pasem (သို့) Pasim ဖြစ်တယ်လို့ဘဲ ဖော်ပြထားတာပါ။
မွန်ဘာသာကနေဆင်းသက်ကြောင်း Hobson-Jobson မှာရေးသားထားခြင်း ရှိမရှိ
ပရိသတ်ကြီး က စစ်ဆေးကြည့်ပါလို့လေးစားစွာ request လုပ်အပ်ပါတယ်။ ပုသိမ် ကို
ကုလားတွေ အုပ်စိုးခဲ့ခြင်း ရှိမရှိနောက်အထောက်အထား တစ်ခုတင်ပြပေးချင်ပါတယ်။
ဇမ္ဗူဒီပ ဥဆောင်းကျမ်း စာမျက်နှာ (၅၈) ပါ ပုသိမ်မြို့ကို ကုလားတွေ စိုးစံခဲ့ကြောင်း
အထောက်အထားပါ။ ဟိန္ဒူကုလား လား ပသီ ကုလား လား ဖော်ပြထားခြင်းမရှိသော်
လည်း မြန်မာ့စွယ်စုံကျမ်းပါ ပုသိမ်ရာဇဝင်ကို အထောက်အပံ့ပြုနေပါတယ်။



မိုရှေးရေဂါရဲ့ The Muslim of Burma စာအုပ်ကို ကျွန်တော် ကိုးကားပြခဲ့တာ က ကိုမြတ်သိန်း
ထွန်း အနေနဲ့ အလွယ်တကူရှာဖွေလေ့လာနိုင်အောင်ပါ။ မိုရှေယေဂါရ် စာအုပ်ကို မကိုးကားဘဲ
လည်း အစ္စလာမ် ဘာသာဝင်တွေ ဟာ ပင်လယ်ကူးသင်္ဘောတွေ ရွက်လွှင့်ရင်း မြန်မာပြည်အောက်
ပိုင်းကမ်းရိုးတန်းဒေသ တွေနဲ့ ရခိုင်ဒေသ ကို အေဒီ ၉ ရာစုကတည်းက ရောက်ရှိအခြေချနေ
ထိုင်မှုတွေရှိခဲ့ကြောင်း ကျွန်တော် အထောက်အထားပြလို့ရပါတယ်။ အဲဒီအကြောင်းဆွေးနွေး
ဖို့စိတ်ဝင်စားတဲ့ ပညာရှင်ရှိရင် အကြောင်းကြားလိုက်ပါခင်ဗျား။ (ဒေါက်တာအေးချမ်း ကလွဲ
လို့ပါ၊ဒေါက်တာအေးချမ်း ရဲ့ စန်ဒီခန်ဗလီ အကြောင်းအရေးအသားကို မြင်ပြီး ကျွန်တော်
အလွန်အထင်နုတ်သွားကြောင်းရိုးရိုးသားသားပြောပါရစေ။) ငရမန်ကန်း ကို "ရာမန်ခန်း" လို့
သုံးသပ်ခြင်း ဟာ မိုရှေယေဂါရ် စပြုခဲ့တာမဟုတ်ပါဘူး။ ဗိုလ်မှူးဘရှင်လည်း မဟုတ်ပါဘူး။
ဆရာကြီး ဦးဘသန်းရဲ့ကျောင်းသုံးမြန်မာရာဇဝင် စာမျက်နှာ (၃၅) ကို ဖတ်ကြည့်ပါ။



နောက်တစ်ချက်က ပုဂံခေတ် က သူရဲကောင်း ဗျတ္တ ကိစ္စပါ။ ဗျတ္တ ဟာ မွတ်စ်လင်မ်
ဖြစ်ကြောင်း မြန်မာနိုင်ငံ က မွတ်စ်လင်မ် အများစု ယုံကြည်ခြင်းရှိမရှိ ဆိုတာ စစ်တမ်း
မကောက်ဖူးလို့ ကျွန်တော်မသိပါ။ သို့သော် ဗျတ္တမွတ်စ်လင်မ် ဖြစ်ကြောင်း ဘယ်ပုဂ္ဂိုလ်
ကြီး က ယုံကြည်ခဲ့သလဲ၊ ယုံကြည်ခဲ့တဲ့ အတိုင်း ဘယ်လိုဖြန့်ချီခဲ့သလဲ ဆိုတာ သိရ
အောင် အောက်က Scan လေးကို လေ့လာကြည့်ပါခင်ဗျာ။ အမျိုးသားပညာဝန် ဆရာကြီး
ဦးဖိုးကျားရဲ့ "ခေတ်မှီမြန်မာရာဇဝင်အကျဉ်း" (၁၉၃၇) စာမျက်နှာ (၃၃) ပါ။

 

ရာဇဝင်ထဲမှာ "ကုလား" လို့ပါတိုင်း မွတ်စ်လင်မ် လို့ နိုင်ငံခြားသားပညာရှင် တွေ က ထင်အောင်
ဗိုလ်မှူးဘရှင် နဲ့ ဦးကြည်တို့ လုပ်ခဲ့တဲ့ အထောက်အထားလေးပေးပါလား ကိုမြတ်သိန်းထွန်း
ခင်ဗျား။ အထောက်အထားမပေးနိုင်ရင် တော့ ကောလဟာလ စွတ်စွဲချက်လို့ဘဲသတ်မှတ်ရပါ
လိမ့်မယ် ခင်ဗျား။ ပြီးတော့၊ နိုင်ငံခြားသားပညာရှင်တွေ က အထောက်အထားမဲ့သူတစ်ပါးပြော
တိုင်းယုံတတ်တဲ့ လူတွေ ဖြစ်ကြောင်း ကိုမြတ်သိန်းထွန်း က အပီအပြင်ယုံကြည်ထားပုံရပါတယ်။

ဆက်ရန်-

မှတ်ချက်

ကွယ်လွန်သူမြန်မာ့သမိုင်းပညာရှင်ကြီး ဇေယျကျော်ထင် ဗိုလ်မှူး ဘရှင် နှင့် တကွလွန်လေပြီး
ခဲ့ကြသော ရိုးသားသည့် မြန်မာ့သမိုင်းပညာရှင် ဆရာကြီးအပေါင်းအား ကျွန်ုပ် ရဲရင့်သစ္စာ မှ
ဤ Note ဖြစ် ရိုသေစွာ အလေးပြု အပ်ပါသည်။